Akot Nagar Parishad Mein BJP–AIMIM Kya Aarahe H Saath? Maharashtra Politics Mein Bada Local Twist.
Akot Nagar Parishad Mein BJP–AIMIM Kya Aarahe H Saath? Maharashtra Politics Mein Bada Local Twist.
Maharashtra ki siyasat mein ek chowkane wala development saamne aaya hai. Akola district ke Akot Nagar Parishad mein BJP ne AIMIM (Asaduddin Owaisi ki party) ke saath milkar ek naya local-level alliance bana liya hai, jise “Akot Vikas Manch” ka naam diya gaya hai.
Haal hi mein hue Akot Nagar Parishad elections mein BJP ki Maya Dhule ne Mayor pad jeet liya, lekin 35 sadasyon wali nagar parishad mein BJP ko clear majority nahi mil paayi. Election results ke mutabiq, 35 mein se 33 seats ke hi results aaye, jismein BJP ko sirf 11 seats mili.
Majority se kaafi door rehne ke baad, BJP ne apne netritva mein ek naya gathbandhan banana ka faisla kiya. Is gathbandhan ko “Akot Vikas Manch” kaha gaya, jiska uddeshya nagar parishad mein stable governance banana bataya ja raha hai.
Is poore gathbandhan mein sabse zyada charcha ka mudda yeh raha ki AIMIM ne 5 seats jeetkar BJP ko support diya. AIMIM Akot Nagar Parishad mein second largest party ke roop mein ubhri hai. AIMIM ka BJP-led alliance ko support dena, Maharashtra ki politics mein ek bada aur unexpected twist maana ja raha hai, kyunki dono parties aam taur par ek-dusre ke political opponents rahi hain.
Is local alliance ke baad political circles mein yeh sawal uth rahe hain ki kya yeh sirf local zarurat ka faisla hai ya aane wale samay mein iske raajya ki siyasat par bhi asar dikh sakte hain.
