Syria Me Hua Takhta Palat, Bashar Ul Asad Hue Farar
Aaj Ham Syria Yani Mulk-E-Shaam Me Aaye Zabardast Inqilab Ki Baat Kareinge.
Pichle 12 Dino Me Hi Mulk-E-Shaam Ki Militant Opposition Party HTS Ne 50 Saal Se Waha Hukumat Karne Wale Zalim Asad Family Ko Hatakar Pure Mulk Par Qabza Kar Liya Hai.
Aap Ko Batadein Ki 1971 Me Hafiz Asad Ne Fauji Bagawat Ke Zariye Mulk-E-Shaam Ki Hukumat Par Qabza Kiya Tha.
San 2000 Me Jab Dil Ki Bimari Ki Wajah Se Hafiz Asad Ka Inteqal Hua To Uske Bete Bashar Ul Asad Ke Paas Hukumat Aagayi.
Lekin Bashar-Ul-Asad Ki Hukumat Ka Takhta 8 December 2024 Ko Palat Gaya Aur Natijatan Bashar Ki Mulk Chhod Kar Bhagna Pada.
Ab Tak Iski Koi Jankari Nahi Hai Ke Wo Bhag Kar Kaha Gaya, Lekin Kuch Reports Ke Mutabiq Russia Ne Use Apne Mulk Me Panah Di Hai To Wahi Kuch Reports Ka Ye Bhi Kehna Hai Ke Uski Flight Me Dhamaka Hone Ki Wajah Uski Maut Ho Chuki Hai.
Ye Inqilab Aaya Kaise? Aur Iski History Kya Hai?
Aaiye Ham Jante Hain Ke Ye Kaisa Inqilab Tha Jisne Aanan-Faanaan Pure Mulk Par Qabza Kar Liya Jis Ke Baad Wahan Ke Aam Citizens Welcome Kar Rahe Hain Aur Saath Hi Josh-O-Kharosh Me Khushiyan Mana Rahe Hain.
Dar Asal Is Sab Ki Shuruaat March 2011 Mein Hui Thi, Jab Logo Ne Bashar Ul Asad Ki Hukumat Se Naraz Ho Kar Pure Mulk Mein Protest Shuru Kar Diya Aur Bashar Ul Asad Se Hukumat Chhodne Ki Mang Karne Lage.
Lekin Uski Zalim Hukumat Ne Bina Koi Madad Kiye Aur Protest Ko Nazar Andaaz Karte Hue Protestors Ke Khilaf Zabardast Action Liya Gaya, Unpar Goliya Barsayi Gayi, Jisme 2/3 Saal Ke Andar Andar Taqreeban 3 Lakh Log Mare Gaye, Aur Bahut Se Logo Ko Hamesha Keliye Jailo Mein Band Kar Diya Gaya.
Aur Is Ke Alawa Pure Mulk Mein Emergency Jaise Qanoon Laga Diye Gaye.
Is Pure Maamle Mein Bashar Ul Asad Ki Hukumat Ko Russia Aur Iran Ne Khul Kar Support Kiya Aur Har Tarah Ki Madad Use Faraham Ki.
Lekin In Sab Ke Bawajood Wahan Ke Logo Ne Himmat Nahi Hari Aur Dheere Dheere Unhone Bhi Ek Militant Group Form Kiya, Jiska Purpose Ye Tha Ke Taqat Ke Zor Par Kisi Tarah Bashar Ul Asad Ki Hukumat Girakar Logo Ko Insaf Dilaya Jaye.
Aap Ko Batadein Ki Unhone Al Nusra Naam Se Ek Group Banaya Aur Uske Leader Ke Roop Mein Abu Muhammad Al Jolani Ko Chuna Gaya.
2012 Se 2017 Tak Ye Group Al-Qaaida Ki Madad Se Apne Operations Anjam Deta Raha, Lekin 2017 Me Abu Muhammad Al Jolani Ne Al Qaida Se Al Nusra Group Ko Alag Kar Liya Aur Group Ka Naam HTS Rakha, Yani Hizbu Tahrir-I-Sham.
Aap Ko Batadein Al Qaida Se Khud Ko Alag Karne Ka Purpose Ye Tha Ke Ab Puri Tarah Mulk-E-Shaam Par Focus Kiya Jaye Aur Ek Aisi Hukumat Qaim Ki Jaye Jis Mein Sab Ke Saath Ek Jaisa Suluk Kiya Jaye Aur Mulk Ki Halat Behtar Ki Jaye.
Ab Aakhir Mein 2017 Se In Logo Ne Jo Mehnat Ki Ye Usi Ka Result Hai Ke Pichle 12 Dino Mein HTS Ne Taqat Ke Sahare Pure Mulk Par Qabza Kar Liya Hai, Airports, TV Channels Sab Kuch Ab HTS Ke Hathon Mein Hai.
Aur Sab Se Aham Baat Ye Hai Ke Is Operation Se Sab Se Zyada Khush Khud Mulk-E-Shaam Ki Awam Hai, Isliye Ke Kai Saal Baad Unhe Azadi Ka Ehsas Ho Raha Hai Aur Unhe Ummid Hone Lagi Hai Ab Mulk Ki Halat Behtar Hogī.
HTS Ne Bhi Logo Se Wada Kiya Hai Ke Wo Mulk Mein Amn-O-Aman Qaim Rakhne Ki Puri Koshish Karenge Aur Har Tarah Logo Ka Saath De Kar Unki Ummido Par Pura Utrenge.
Ab Dekhna Ye Hoga Ke International Powers Jaise Russia Aur America Kis Tarah Aane Wale Dino Mein Is Nayi Hukumat Ke Saath Behave Karte Hain, Aur Saudi Iran Ke Beech Is Ko Lekar Kiya Strategy Banate Hain.
Aage Ki Development Se Ham Aap Ko Aagah Karte Rahenge, Galli News Ke Saath Jude Rahe. Abhi Ke Liye Khuda Hafiz.
