*Haj 2026 ke liye ₹10,000 extra charge, aazmeen mein narazgi.*
View this post on Instagram
Haj 2026 par jaane wale Hindustani aazmeen ko ab ₹10,000 extra dene padenge. Haj Committee of India ki taraf se jaari bayan ke mutabiq airfare mein izafa hua hai kyunki duniya bhar mein Aviation Turbine Fuel (ATF) ki qeemat badh gayi hai.
Hukumat ka kehna hai ki airlines ne asal mein $300–$400 tak zyada kiraya maanga tha, lekin baat-cheet ke baad is izafe ko sirf $100 yani taqreeban ₹10,000 tak rakha gaya. Tamam aazmeen ko “differential airfare” ke taur par ye extra raqam 15 May tak jama karna hoga.
Markazi hukumat ka kehna hai ki agar airlines ki poori demand maan li jati to aazmeen par ₹30,000 se ₹35,000 tak ka extra bojh pad sakta tha, lekin hukumat ne mudakhlat karke izafe ko kam rakha hai taaki hajiyon par zyada bojh na pade.
Is beech kai jagahon par aazmeen-e-huj mein narazgi bhi dekhi ja rahi hai, jahan logon ka kehna hai ki achanak itna izafa unke liye mushkil paida kar raha hai.
Is silsile mein Asaduddin Owaisi ne social media platform X par tanqeed karte hue likha, “Kya Haj Committee ke zariye jaane walon ko saza di ja rahi hai? Zyada tar aazmeen ameer nahi hote, balki Haj par jaane ke liye ek-ek paisa jama karte hain. Hukumat ko yeh faisla wapas lena chahiye.”
*Aap apne comments hamein zarur kijiye aur Khabaro k liye Galli news par bane rahiye.*
