Child Molestation Mamla: Kolkata Court Ne Farman Ansari Ko 28 July Tak Dindoshi POCSO Court Mein Surrender Karne Ka Aadesh Diya
Oshiwara Police Station mein Kolkata ke 22 saal ke Farmaan Rehmat Ansari ke khilaf POCSO Act ke tehat case darj kiya gaya hai.
Aarop hai ki Farmaan Rehmat Ansari ne apni hi ek nabalig rishtedaar ladki ke saath Mumbai aur Kolkata mein kai mahino tak baar-baar molest kiya.
Shikayat ke mutabik Farmaan parivaar ka door ka rishtedaar tha aur isi wajah se uska ghar par aana-jaana tha. Aarop hai ki usne isi bharose ka fayda uthakar kai baar nabalig ke saath galat harkatein ki.
Shikayat ke anusaar, pehli ghatna May 2025 mein hui thi jab aaropi pehli baar unke ghar aaya tha. Iske baad Kolkata mein ek programme ke dauran bhi molest karne ka aarop hai.
Complainant ka kehna hai ki ladki ne dar aur sharm ki wajah se kai mahino tak kisi ko kuch nahi bataya. Trauma mein rehne ke baad usne apni maa ko poori baat batayi, jiske baad Oshiwara Police Station mein FIR darj karwayi gayi.
Oshiwara Police ne BNS ki Dhara 74 aur POCSO Act ki Dhara 8, 10 aur 12 ke tehat case darj kiya hai.
Parivaar ka Kehna hai ki Farmaan Ansari purv TMC Corporater Rehman Ansari ka beta hai
Parivaar ke mutabik Mumbai Police ki team Kolkata gayi aur aaropi ko pakadkar transit remand ke liye local court mein pesh kiya gaya. Lekin procedural aur legal compliance issues ke chalte transit remand nahi mila.
Parivaar ke mutabik Kolkata Court ne aaropi ko 28 July 2026 tak Mumbai ki Dindoshi POCSO Court ke samne surrender karne aur kanooni prakriya follow karne ka nirdesh diya hai.
Parivaar ne fair, impartial aur time-bound investigation ki maang ki hai. Saath hi media aur public se appeal ki hai ki nabalig ki pehchan ujagar karne wali koi bhi jaankari share na karein.
Parivaar ne kaha hai ki unhe kanoon par poora bharosa hai aur woh sirf kanooni tareeke se insaaf chahte hain.
⚠️ Awareness: Agar kisi bachche ke saath kisi bhi tarah ki galat harkat ya abuse ho, to use chup na rakhein. Bachchon ki baat dhyan se sunein, unka saath dein aur turant police ya Child Helpline/Police ko suchit karein. Bachchon ki suraksha hum sab ki zimmedari hai.
