Maharashtra mein bina FSSAI Licence Health Supplements aur Gym Protein Powder ki bikri par sakhti, misleading advertisements par ₹10 lakh tak fine.
Maharashtra FDA Commissioner Tukaram Mundhe ne health supplements, gym protein powder aur nutraceutical products ki bikri ko lekar rajya bhar mein sakht guidelines jaari ki hain. Ab gyms, fitness centres, pharmacies aur medical stores ko health supplements bechne ke liye zaroori FSSAI Food Licence ya Registration lena hoga, chahe unke paas kisi doosre department ka licence pehle se ho.
Bina required licence ke in products ki commercial sale ya storage par karwai ho sakti hai.
Social media influencers aur companies ko bhi misleading advertisements aur jhoothe health claims karne par ₹10 lakh tak fine bharna pad sakta hai. FDA ne 13 November ko Maharashtra ke 6 divisions mein 17 establishments ki jaanch ke dauran ₹1.38 crore se zyada ka stock zabt kiya, jiske samples laboratory mein testing ke liye bheje gaye hain.
FDA Commissioner ne logon, khaaskar youngsters ko doctor ki salah ke bina supplements istemal na karne ki appeal ki hai.
Unhone kaha ki health supplements medicines ka alternative nahi hain aur kisi bimari ko cure karne ka daawa nahi kar sakte.