“Mumbai Police Ka Zero Tolerance: Apne Hi Policeman Ke Khilaaf Action, Divyang Yuvti Chhedkhani Case Mein ASI Giraftar” Tardeo Molestation case
[ads]
Mumbai se ek sharmnak aur hairaan kar dene wali ghatna saamne aayi hai. Tardeo area me Mumbai Police ke Assistant Sub-Inspector (ASI) Sanjay Rane ko 18 saal ki divyang yuvti se chhedkhani ke aarop me giraftar kiya gaya hai. Yeh poori ghatna ka video social media par viral ho raha hai, jisme ASI logon se maafi maangta hua dikh raha hai.
Yeh incident Monday, 22 December ko shaam kareeb 5:30 baje ka bataya ja raha hai. Tardeo RTO ke paas sthit BMC ke Bhausaheb Higher Garden me ASI Sanjay Rane ne yeh ghinoni harkat ki. Aropi us waqt police uniform me hi maujood tha.
Mumbai Police ke mutabik, ASI Sanjay Rane garden me jaakar 18 saal ki divyang yuvti ke paas baith gaya aur uske saath chhedkhani karne laga. Yuvti ASI ki harkaton se kaafi asahaj aur pareshan ho rahi thi. Garden me maujood logon ne jab yeh sab dekha, to turant beech-bachav kiya aur ASI ko rangey haath pakad liya.
Is dauran wahan maujood logon ne video bhi record kar liya, jisme ASI Sanjay Rane logon ke saamne maafi maangta hua nazar aa raha hai. Baad me log usse seedha police station le gaye.
Police Station Le Jaane Ke Baad Police Ne Turant Action Lete Huwe ASI Sanjay Rane Ko Arrest Kiya, Giraftari ke baad ASI Sanjay Rane ko court me pesh kiya gaya, jahan se court ne usse 26 December tak police custody me bhej diya hai. Police maamle ki aage ki jaanch kar rahi hai.
