Mumbra Balcony Slab Collapse: 13 Saal ki Bachchi ki Maut, 70–80 Logon ko Building se Hataya Gaya.

Mumbra Balcony Slab Collapse: 13 Saal ki Bachchi ki Maut, 70–80 Logon ko Building se Hataya Gaya.

Thane ke Mumbra ke Amrut Nagar, Dargah Gali me Janata Bakery ke paas sthit Faiyaz Apartment me 27 July ki shaam lagbhag 7:00 baje second floor ki balcony ka slab achanak first floor par gir gaya.

Is haadse me ek bacchi, 13 saal ki Asma Qadar Shaikh gambhir roop se ghayal ho gayi.

Use turant Chhatrapati Shivaji Maharaj Hospital, Kalwa le jaya gaya, jahan doctors ne use mrit ghoshit kar diya.

Batadein ki, Haadse ke baad malbe me phase 6 logon ko rescue kiya gaya, jinme 5 log surakshit nikale gaye.

Rescue operation me Thane Fire Brigade, Disaster Management Cell aur anya agencies ne hissa liya.

Mili jankari ke mutabik, lagbhag 38 saal purani yeh building C-2B category me shamil thi. Suraksha ko dekhte hue poori building ko khali kara diya gaya aur karib 70–80 residents ko temporary taur par Thane Municipal Corporation (TMC) ke school me shift kiya gaya.

Ghatna ke karanon ki jaanch jaari hai aur adhikari building ki structural condition ki bhi jaanch kar rahe hain.