Naye Islami Saal 1448 Hijri Ka Aaghaz, Kaaba Par Naya Ghilaf” Qiswa” Chadhaya Gaya.
Saudi Arabia mein naye Islami saal 1448 Hijri ka aaghaz ho gaya hai.
Monday ko Muharram ka chand dekhne ke liye khaas ehtemam kiya gaya tha, jiske baad 16 June ko 1 Muharram ka elan kiya gaya. Is mauqe par Masjid al-Haram mein Kaaba Shareef par naya Kiswah (Ghilaf-e-Kaaba) chadhaya gaya.
Dosto, aap ko bata dein ki,
is Ghilaf ko tayyar karne mein lagbhag 11 mahine lage. Is ka kul wazan 1415 kilogram hai aur iski tayyari mein 825 kilogram kudrati resham, 120 kilogram sone ke dhaage aur 60 kilogram chandi ke dhaage istemal kiye gaye hain.
Makkah ke King Abdulaziz Complex mein tayyar kiye gaye is Ghilaf par 68 Qurani ayaat bahut khoobsurti se kadhai karke likhi gayi hain.
Kaaba ka Ghilaf duniya ke sabse khaas aur qeemati Islami karigari ke namoonon mein shamil mana jata hai.
Qabil-e-zikr hai ki pehle Kaaba ka Ghilaf har saal Yawm-e-Arafah (9 Zul Hijjah) ke din badla jata tha, lekin Saudi hukoomat ne kuch saal pehle is riwayat mein tabdeeli karte hue Ghilaf ki tabdeeli ko naye Islami saal ke aaghaz yani 1 Muharram se jod diya.
Ab har saal Muharram ki pehli tareekh par Kaaba ko naye Ghilaf se aarasta kiya jata hai.
*Aap apne comments hamein zarur kijiye aur khabaro k liye Galli news par bane rahiye.*
