NCB Mumbai Zonal Director Amit Ghawate Samet 2 Aur Officer Par FIR Darj
Navi Mumbai mein ek businessman ke suicide ke baad controversy saamne aayi hai. Narcotics Control Bureau (NCB) ke zonal head Amit Ghawate, officer Akash Malik aur Belapur Anti-Narcotics Cell ke Sandip Nigade ke khilaaf FIR register ki gayi hai.
Yeh case builder ki patni ki complaint par based hai, jinhone aarop lagaya hai ki unke pati ko lagataar mental harassment, dhamki aur extortion ka saamna karna pada, jis wajah se unhone 25 April 2025 ko suicide kar liya.
FIR ke mutabik, builder ne Belapur ke apne office mein 9 mm pistol se khud ko goli maar li thi. Us waqt investigation mein yeh angle bhi saamne aaya tha ki unke bete ke alleged drug trafficking case ki wajah se un par kaafi pressure tha.
Complaint mein yeh bhi kaha gaya hai ki officers ne allegedly ₹10-15 crore ki demand ki aur dhamki di ki agar paise nahi diye gaye toh poore parivaar ko case mein phasa diya jayega. Family ko baar-baar inquiry ke liye bulaya gaya aur ghanton tak baithaya gaya
FIR ke hisaab se 2 February 2025 ko 15-20 NCB officials bina notice ke ghar pahunch gaye the. Ghar band hone par domestic worker ke saath badtameezi aur maarpeet ka aarop hai, aur society ka CCTV DVR bhi seize kiya gaya. Baad mein ghar aur office par bina warrant search karne aur documents, passports, bank records, valuables aur ₹2 lakh cash lene ka bhi aarop hai.
Suicide spot se mile handwritten notes mein builder ne likha ki unka apne bete ke alleged activities se koi lena-dena nahi hai. Unhone kaha ki unke parivaar ko unnecessarily case mein ghaseeta ja raha hai, aur agar aisa chalta raha toh unke paas “koi option nahi bachega”.
Police ne is case mein Bharatiya Nyaya Sanhita (BNS) ke sections 108 (abetment), 308(3) (extortion), 352 (intentional insult), 351(2) (criminal intimidation) aur 3(5) (common intention) ke tahat FIR darj ki hai.
