Shawarma Khane Ke Baad 14 Log Hospital Mein Bharti, FDA Aur Police Ki Jaanch Shuru
Bhiwandi ke Khandu Pada area mein shawarma khane ke baad 14 logon ki tabiyat achanak kharab ho gayi. Sabhi ko ulti, dast, pet dard aur sir dard ki shikayat ke baad hospital mein bharti karaya gaya.
Asif Sayyed ne bataya ki unhone shawarma aur pizza kharida tha. Raat mein khana khane ke baad sab normal the, lekin subah uthte hi ghar ke kai logon ko ulti aur pet dard ki shikayat shuru ho gayi. Iske baad unhe turant Indira Gandhi Memorial (IGM) Hospital le jaya gaya.
Ek doosre parivar ke Ansar Ahmad Ansari ne bhi bataya ki unke ghar walon ne shawarma aur falooda khaya tha. Agli subah unki family ke kai Members ki tabiyat bigad gayi aur unhe bhi hospital mein admit karna pada.
Ghatna ke baad Food and Drug Administration (FDA) ki team ne suspected food outlet par pahunchkar khane ke samples collect kiye hain. In samples ko laboratory test ke liye bheja gaya hai taaki pata chal sake ki khana contaminated tha ya nahi.
