Smartphone Screen Guard Kharidne Walon Ke Liye Important Update: 1 April 2027 Se BIS Certification Mandatory

Smartphone Screen Guard Kharidne Walon Ke Liye Important Update: 1 April 2027 Se BIS Certification Mandatory

Mobile phone par lagaya jaane wala screen guard ya tempered glass ab bina government quality certification ke nahi becha ja sakega. 1 April 2027 se smartphone screen protectors ke liye BIS certification mandatory hoga.

Naye rules ke mutabik, screen protectors ko Indian Standard IS 19348:2025 ke standards par khara utarna hoga. Ismein glass ki strength, thickness, scratch resistance, adhesive quality aur tootne par bikharne se bachane ki capacity ki testing shamil hogi. Oleophobic coating, blue-light filter aur privacy screen jaise features bhi iske daayre mein rahenge.

Manufacturers aur importers ko 1 April 2027 tak laboratory testing aur certification complete karna hoga. Rules lagu hone ke baad standards par khare nahi utarne wale uncertified ya duplicate screen protectors ke production, import aur sale par rok lag sakti hai.

Customers screen guard kharidte waqt packaging par BIS mark aur registration number zaroor check karein. Is number ko official BIS CARE App par verify bhi kiya ja sakta hai.

Aapko bata dein ki industry estimates ke mutabik, India mein kareeb 90% screen protector supply unorganised ya grey market se aati hai, jismein zyadatar products China se import hote hain aur kaafi saste hote hain.

Naye BIS rules ke baad testing aur certification ka kharcha badhne se smartphone screen guards shuruaat mein thode mehnge ho sakte hain. Ab bada sawaal yeh hai ki kya Indian manufacturers quality maintain karte hue Chinese products ke daam se competition kar payenge?