Malad Mein Shivaji Maharaj Ke Jiretop Par Jain Jhanda Lagane Se Vivaad, MNS Ke Virodh Ke Baad Maangi Maafi
Malad East mein Chhatrapati Shivaji Maharaj ke pratikatmak Jiretop (rajmudra pagdi) par Jain dharm ka safed jhanda lagane ko lekar vivaad khada ho gaya. Ghatna ke baad Maharashtra Navnirman Sena (MNS) ke karyakarta aur sthaniya logon mein narazgi dekhne ko mili.
Malad East ke ek vyast chowk par Shivaji Maharaj ke Jiretop ka ek bada pratikatmak sculpture sthapit hai. Ek dharmik karyakram ke dauran Jain samuday se jude ek vyakti ne kathit taur par structure par chadhkar uske upar safed Jain dhwaj laga diya.
Vivaad badhta dekh police bhi turant mauke par pahunchi aur sthiti ko niyantran mein liya. Police ki maujoodgi mein MNS karyakartao ne sambandhit vyakti se sawal kiye aur virodh jataya.
Badte virodh aur tanav ke beech vyakti ne baad mein sarvajanik roop se maafi maangi. Haath jodkar usne kaha ki yeh galti anjaane mein hui aur uska kisi ki bhavnaon ko thes pahunchane ka iraada nahi tha. Iske baad Jiretop par lagaya gaya safed jhanda hata diya gaya
