All NewsBreaking NewsMumbai

Mumbai Mein 7 Aur 8 November Ko Aag Ki Kai Ghatnayein, Dongri Mein Bhayankar Aag Se Samaan Jal Kar Khaak, Andheri Mein Ek Shakhs Ki Maut.

Mumbai Mein 7 Aur 8 November Ko Aag Ki Kai Ghatnayein, Dongri Mein Bhayankar Aag Se Samaan Jal Kar Khaak, Andheri Mein Ek Shakhs Ki Maut.

Mumbai mein Diwali ke dauran kul 89 jagahon par aag lagne ki ghatnaon ki reports aai saamne.

Diwali ke dauran Mumbai aur aas-paas ke ilaakon mein aag lagne ki kai ghatnayein saamne aayi hain.

7 aur 8 November ko alag-alag jagahon par lagi aag mein ghar, dukaan, garage, building ke kuch hisse aur doosra samaan prabhavit hua.

Aaiye jaante hain, 7 aur 8 November ko kahan-kahan aag lagi aur kya nuksan hua.

7 November 2026.

Andheri West ke Lokhandwala mein Runwal Elegante building ki 17th floor par ek flat mein raat kareeb 9:50 baje aag lagi. Is haadse mein liftman Dhanpat Mahatu, 46, lift mein phans gaye aur dam ghutne se unki maut ho gayi. Aag par raat 10:37 baje tak kaabu pa liya gaya. Aag lagne ki wajah ko lekar diya jalne ka shak jataya gaya, lekin iski pushti nahi hui.

Kandivali West ke Thakur Village ke paas Siriya Building mein ground floor par purane diesel generator aur refuge area mein aag lagi.

Goregaon East ke Royal Palms ke Moroccan Apartment mein 19th floor ke flat ki gallery mein aag lagi, jismein wiring, kapde aur ghar ka kuch samaan prabhavit hua.

Mankhurd ke Mandala mein Yusuf Hotel ke paas ek scrap ki dukaan mein bhi aag lagi, jismein kabad ka samaan prabhavit hua. In ghatnaon mein kisi ke zakhmi hone ki khabar saamne nahi aayi.

8 November 2026.

Dongri ke Haji Kasam Chawl mein Dr Maheshwari Road par Datta Mandir ke paas raat kareeb 9:37 minut par garage mein aag lagi. Aag paas ki dukaanon aur jhuggiyon tak phail gayi aur aag n kaafi bhayank roop le liya, Ismein electrical wiring, furniture, LPG cylinders aur doosra samaan prabhavit hua. Aag par 9 November ki subah 7:23 baje tak kaabu paaya gaya.

Dadar West ke Kamgar Stadium mein Dr Babasaheb Ambedkar Nagar ke paas subah kareeb 10:15 minute par lakdi aur bamboo ke decoration ke samaan mein aag lagi. Ise 10:32 baje tak bujha diya gaya.

Andheri East ke Marol mein Prime Academy School ke paas raat 10:51 baje garage mein aag lagi,

jabki Vidyavihar West mein Skyline Vida naam ki 10 manzila commercial building ki 7th se 10th floor tak aag pahunchi. Dono jagahon par aag par 9 November ki subah tak kaabu pa liya gaya. In ghatnaon mein kisi ke zakhmi hone ki khabar nahi thi.

Galli News viewers ne bhi bheje aag ke videos.

Inke alawa 8 November ko Kurla East, Kurla West, Kurla LIG, Mira-Bhayandar, Malad Highway, Dharavi, Malad Malvani ke Mahakali Nagar ki ek building ke flat, Kandivali Thakur Village, Versova Shastri Nagar, Andheri Lokhandwala ke kachre ke dher, Santacruz ke Dolat Nagar, Malad East ke Pimpri Pada, Malad Nana Compound, Jogeshwari Highway, Marol Naka ke Bhawani Nagar, Kalbadevi Station ke paas ek building par lage safety net, Goregaon Mantri Park, Andheri East Marol, Carter Road, Azad Nagar Petrol Pump aur Chor Bazaar ke Bara Imam Road se bhi aag lagne ki khabrein aur videos Galli News ko viewers ne bheje hain.

Viewers ke bheje gaye kuch videos mein rocket ki wajah se aag lagne ki baat kahi gayi hai, khaaskar Andheri Lokhandwala ke kachre ke dher aur Kalbadevi Station ke paas building par lage safety net ke maamle mein.

Halaanki, in sabhi jagahon par aag se hue nuksan aur wajah ki alag-alag pushti abhi zaroori hai.

Mumbai ke kai ilaakon se saamne aayi in ghatnaon ne Diwali ke dauran fire safety ko lekar sawaal khade kiye hain. Is maamle mein aapki kya rai hai? Apni rai comments mein zaroor batayein aur more updates ke liye Galli News par bane rahiye.

Related Posts

1 of 19,590