*School Parents Alert: RTE Admission ke naye rules jaari.*
State government ne RTE admission ke rules mein bade badlaav kiye hain. Ab parents ko sirf ghar ke aas-paas, yani 1 kilometer ke radius ke andar aane wali schools mein hi admission milega.
Pehle yeh distance limit 3 kilometer tak hoti thi, lekin naye rules ke mutabik ise ghata kar 1 kilometer kar diya gaya hai.
Naye niyamon ke hisaab se ab parents maximum sirf 10 schools hi select kar sakte hain, aur woh bhi sirf usi 1 kilometer ke area ke andar honi chahiye. Iske saath hi GR mein yeh bhi compulsory kar diya gaya hai ki form bharte waqt hi sabhi documents online upload karna zaroori hoga.
Aadhar card ka address bhi form mein diye gaye address se match hona chahiye. Agar address match nahi hua, toh physical verification ki process ki jayegi.
Advocate Adil Khatri ne is GR ki tanqeed karte hue kaha, “Yeh GR students ke favour mein nahi hai.
Bohut si schools mein RTE ki seats khali reh jaayengi. Pehle distance 3 kilometer tak tha, ab ise kam karke 1 kilometer kar diya gaya hai.”
Aapko bata dein ki RTE Act ke tahat private unaided schools mein 25 percent seats socio-economically disadvantaged backgrounds ke bachchon ke liye reserved hoti hain, jiska kharcha state government schools ko reimburse karti hai.
